Dua a Libre a Pannangan Para iti Panagdaliasat



Che Guevarra, agul-ulbodka.


Ken dakayo aminen a lallakay
nga agtaltalanggutang kadagiti diario
ti wayawaya ken mangibagbaga
nga awan libre a pangngaldaw.

Uray daytoy a Fidel Castro
ket nagriro, ita nga agdama.

Ita nga aldaw, iti Sabado a nakullaap ti Oahu
ket ti kari ti napigsa nga angin
manipud iti pagtundaan ti pul-oy
a paset dagiti biagtayo a tagtagipuro,
tinallikudantayo daytoy tagainep
nga ipinget ti panagubra
a pangsulnit iti gastos ti pangngaldaw.


Ta ita, iti 21 ti Noviembre,
maysa a lawas kalpasan
panangikupinmi kadagiti libro
iti panagkakammayat iisiptayo nga Ilokano,
iti 'Olelokami a napan nagteyping
ket idineklarami a dakami
dagiti parairakurak iti puro a rebelion
nga awan ni asinno man mangayat
a mangipusta wenno mangiwarnak
lallalo a mangilawlawag. Isu a nagsasaritakami,
iti baet dagiti panagkibur ti mabisbisinan
a puso iti diskutir no ania ti ili,
no ania a talaga ti nasion nga Ilokano
ken no kasano ti makigerra para kenkuana
daytoy nga ipatpateg, ay-ayaten, musa
daytoy a daga-ti-puso nga am-ammo ti puso
nga awanan labas ngem itan ken nalikmot
maysa a malmaldaang a republikat' rugrugso
nga agingga ita, ita nga aldaw, ditay ammo
no ti baniaga a kinasiudadano
ket iti agtabtabugga a danum
wenno ti dunggiaran a daga
wenno dagiti narasi itan a dokdokumento
a ti dati a pagilian ket imbagana
a pammaneknek kinaasinno:
kas iti daytoy a nasion dagiti manmano,
kas kadagiti mannurat a mangal-allilaw
mangibagbaga a nakasuraten
kadagiti ladladingit dagiti kailian
ngem ti met laeng mannakaiapid
a derrep ti maipakita
wenno poligamoso a frase ti mangibaga
a ti Ilocos ket adda kadagiti bulsada
kas kadagiti mannuratda, agbugbugsot,
di agpampanunot ken asidegen iti tanem
ti pananglipat, sindadaan a pumusay.


Che Guevarra, agul-ulbodka.


Ita, iti Thelma's iti Waipahu,
nakiranudkami iti libre a pangngaldaw
babaen iti sayaat
a milagroso nga inkam nabirokan.


Napankami timmabuno
iti seremonia ti Mahakahi iti baybay,
ket ti sagrado a bato
ket imparipiripna kadakam
dagiti dunor ken bendision
maymaysa ken isu met laeng,
ket iti panagawid
babaen iti freeway manipud laud
ket ti kararag ti panagmakaammo-ditan
a dimi unay ammo ngem malagipmi
manipud iti umuna a letra agingga
iti mismo a balikas ti isusuko
iti no ania ti kabaelan ti revolusion
a mangted iti maysa a pulgada,
maysa a pulgada laeng iti apagapaman,
nga agtunda iti wayawaya
a maaddaan iti libre a pangngaldaw
katinnakunaynay iti gimong
dagiti agsasao iti Ilokano
iti baro a daga.


Ket iti rabii iti Wah Kung
iti H-1 papanurnoran
ket ti diaya para iti libre a pannangan
ti pagayam nga ammona ti agkanta
iti Ilokano dagiti darepdeptayo,
ti duayyana ket kasam-itan
nga ayug a naimdengan
iti nabayagen a panawen.

Ngarud kadakayo a revolusionario
iti walangwalang, aminkayo
ket nagkibaltang: dua a libre
a pannangan ti nakairanudanmi
ita iti kalkalsada nga agtunda
iti agnanayon, ti dalan
a maipapan iti kaibatogan kinawayawaya
ti dalan maipapan iti no kasano ti agayat
iti amin a panawen
ken mangidayyeng kadaytoy
babaen iti daniw
tapno agkantatayo nga ingget sam-it
no ti musika daytoy ket dumteng.



A Solver Agcaoili
Ala Moana Park/Nov 21, 2009

No comments: