Iti isasangpet a panagsubli
ket ti buya a mangyaw-awan.
Agsalsala dagiti parol
iti rabaw ti danum nga iti napalabas
ket tanem dagiti maigarangugong
a buteng, namnama, pakaasi,
paarayat, araraw, panagkari
iti mangirurumen nga agmatuon.
Iti Karayan Marikina
daytoy, iti oras ti anghelus
dagiti agdebdebosion a basol.
Iti rangtay ket ti aligaga,
estranghero a rikna itan
ngem residente iti isip
kadagiti amin a kita
ti pannakalmes.
Agkiet ti agawid a rusok
iti paripirip ti lagip ti Ondoy.
kas kadagiti aminen
a didigra a kapay-an
iti panagpaspasugnod
dagiti agmirmiron a balikas
tapno iti likud ti sipnget
ket ti aligaget iti sentido
a kadagiti lua nga agarubos
ket ti ragsak a maaradas.
Ti gabat ti nangukkon
iti apagapaman a namnama
kadagiti naglugan iti daytoy
tapno iti rungsot ti gasat
ket ti panagpagungga ti layus
ken ti panangilili ni patay
iti kubbuar sa ti alikuno
kadagiti pannakatay a disoras
iti panangrugi kas iti panagikipas.
Ipalladaw dagiti sitsitik a redentor
ti tali ti pannakaisalakan
nga iti apagapaman
ket maarinebneb met daytoy,
kadua ti riper sa ti apres
sa ti awan patinggana a lansad
ti malas iti dawel nga alikuteg.
Amin dagitoy ket iti isip
nga agtaeng ita,
ditoyda nga agindeg
tapno iti agsapa dagiti kararag
ket ti pannakipagrikna
ti agapon a panagmalmalanga.
A Solver Agcaoili
Marikina/Dis 18, 209
No comments:
Post a Comment