Burabor

Sumang. Daytoy ti adda
iti aginaldaw a leddaang

iti adayo a lugar a nagtalappuagawan
pangpanggep iti pagilian.

Sumangen babantot
kas saksakidol. Wenno mamayo.

Wenno ti panagbaniaga
dagiti rugso panpantok

a di met matagikua.
Ta ania ngarud: iti ili

ket ti addaan iti dokumento
kas iti binta dingdingnguen

titulo dagdaga nga agur-uray
pammaneknek iti apros

dagiti mailiw nga ima.
Ngem kasano nga agsukay

ti amo, isuna nga agek
ti para kenkuana, manipud dapan

agingga iti teltel sa iti ulo
tapno iti lulonan ket ti nagan

ti kabaruanan a tagabo a datayo:
ditoy, kadagiti walangwalang

batbatibat a di masinuno
ditoy a biroken ti ipus

ti pagi, sa ti lana nga iti Viernes
a sagrado ket sapsapo

matanamitiman, makurusan
ti birtud ti orasion ti adda

aglansad iti praskita a nagawangan
sa ita ket ti maikarga a sumang

tapno kadagiti rabii nga agtugtuglep
a ti ridep ket di met managibi

ket ti allangon ti bileg ti burabor
ili kas iti mailiw nga umili.

Itugotmo daytoy iti panagdaliasat
isakibut nga ipuslit beddeng

pampanawen a pagrutingan
maiwawwawa nga ayat.


Hon/HI

No comments: