TITANYEN, Haite - And each day, the dead keep coming. Paul Have, AP Dispatch, Jan 20, 2010
Agpasangpet a kas bumalay
ti abut a daga a malmalday iti daytoy
a pagibasuraan nga iti panagretiro
dagiti am-ammo a buyok tapno kumleb
iti saklot ti lidem ket ti panagrupsa:
amin-amin, nabiag wenno ti asintado
a panagduadua no sadinno
ti pagturogan dagiti mapnek nga igges
nga iti ritual ti rakaya ket ti marunot
ti lagip kas iti lasag iti daytoy a didigra.
Apagapaman laeng ti seremonia
ti panaggabur: awan ti napait a dung-aw
kas iti panagliwat ti anug-og
ken aminen a panagidulin iti im-imeten
a dagensen iti nagpasina a barukong
tapno kadagiti narasay a saning-i
ket ti nalabon a panagitabon
kadagiti ribo a ti simbeng ti ulo mabuong.
Ta kasano koma a mabukatan
ti kastoy a tanem no uray ti kararag
ken patay ket ti mababain a pakinakem
wenno asi wenno ayat, amin dagitoy,
iti rupa dagitoy a kas-ang ita
nga iti apagdarikmat ket ti paripirip
ti pakpakadaan a diram-os
tapno di maan-annongan
tapno ti kararua agbati iti nagan.
Hon, HI
No comments:
Post a Comment