Sika ti pul-oy manipud iti taaw,
Wayaway, angin-daya, mangiparparabur
Elemento a mamagtignay kaniak. Ita ket
Ti panagbettak ti bannawag
Ket daytoy a tagainep tinagikukuanak
Idinto ta addaka nga agwaywayas,
Aprosam ti kalachuchi,
Bulong nga adda iti tawak iti daytoy
A kutimermer iti panawen ti lam-ek.
Kadagiti kabambantayan ti Makakilo,
Idiaykan ita, agkumkumpas iti aweng
Dagiti kumaripas a biag, adda kadagiti lugan
Tapno mangibienes iti oras
Kadagiti dadakkel a tattao iti Waikiki. Daytoy
A ritual ket tapno makaidasar
Iti makan iti lamisaan, ket daytoy ket madagdagullit
Kas iti panangpanawpanawmo kaniak.
Kumutukot ti lammin kadagiti tultulang
Ti baniaga a kas kaniak,
Gapu ti iyaalusiisko a mangiyebkas
Iti daytoy a kararag iti maminsan pay
Iti sulinek nga altar ti aldawko:
Dinak tallikudan angin, anges
Ere, pul-oy. Agtalinaedka iti nabaybayag
Ket iyarasaasmo kaniak ti anag
Ti maysa a bigat iti Honolulu
Ken ti wagas iti seremonia
Ti panangselebrar iti sao
A maisurat iti daytoy a pagina, a daytoy
Ket maipapan kadagiti pakarigatanmi.
Ita nga aldaw, isayangkatmi manen
Ti maysa a pannakigasanggasat
Tapno matimudmi ti bukodmi a timek.
Baliksenmi iti nangatngato a timbre,
Nalawlawag itan. Masapul a mangngeganmi
Ti isawangmi. Kas iti panagbettak ti agsapa,
Makitami a sumangbay
Ket iti di agbayag ket ti agmatuon
Nga agbalin nga adu a sagrado nga oras
Kadagiti biagmi nga agbalbaligawgaw.
Wayaway, pul-oy-daya, agbalinka koma
Nga Amian, ti pul-oy-amianan, ket punuem
Dagiti pusomi. Ayabam met ti Abagat, ibagam
Nga agindeg kadagiti nabartek a rabiimi,
Ikkannakami iti pannakausaw,
Sipupuot kadagiti duayya ti Pangagdan,
Tapno sadiay, iti ilelennek ti init,
Umay kadakami ti pannakapnek
Iti darepdep ti ballailo a gapu
Ti panagbayanggudaw ditoy.
Translated from the English original/
Honolulu, HI/ Dec 26, 2011
No comments:
Post a Comment