Badeng ti Baglan
Siak, siak ti baglan iti panawen
sakbay ti panawen. Siak, kadagiti palad,
ditoy dagiti energia ni ayat, kasupadi
ti rikriknaen, sagubanit ti langit
nga iti init ket ti leddaang. Maipusing
daytoy kadagiti lasag tapno iti apros,
naanus ken ingget lamuyot,
ditoy a maipasag ti aggurigor a ragsak.
Iti ablon dagiti ima a maitukit
amin a bin-i ti an-anayen. Ditoy,
kadagiti barukong, addada ditoy
dagiti espiritu a kadagiti bulbulong
ket agindeg, kadagiti ungto ti sabong,
iti petalo dagiti agbukarkar nga aldaw
a mangiwaragawag ti gibus ni patay.
Alaek ti anglem, tiritirek pay maminsan
tapno iti kada singgalot dagiti nginabras
ti daton ket iti surnadan, sadiay,
sadiay a maidasay ti asuk. Parmekenna
ti kimat ken gurruod, pasukuenna
dagiti ballatek tapno ti anak-ti-sal-it
a gasat ti ili ket agbalinsuek.
Hon, HI/
Marso 15, 2012
No comments:
Post a Comment