Balikas
Xu Huaiqian, the chief editor of the People’s Daily‘s
“Earth” supplement committed suicide last week on 22 of August, 2012. He once
said during his lifetime that what pained him was that what he dared to think
he dared not say, what he dared to say he dared not write, and what he dared to
write he dared not publish. (via China Media Project)
Misterio ti balikas, apo a mannurat.
Misterio met dagiti poder kadagiti
linabag,
Dagiti manglimlimo kas kadagiti Ilokano
A mannurat nga iti suli ket ti
sinusutil a kalat
Nga iti panagbasa kadagiti talado
Iti nalibeg a danum ket ti maipatedted a
dara
Ti nakem nga iti karsel ti panunot ket
sadiay
Nga agsadag, kadagiti bartolina a di
maungpot,
Kuadrado kadagiti buteng iti silaba
Ti nagriro nga ayat. Awan demokrasia
Iti papel, kas met iti kambas. Awan
wayawaya
Iti darepdep iti angin nga iti pul-oy
ket ti mangliliput
A ragsak. Saan a katawa ti adda iti uni
ti anamong,
Saan met a ranggas ti adda iti
panagadi.
Iti gimong dagiti maiwarnak a frase
Ket ti gimong ti makettel a buteng,
maysamaysa
Iti kada aglabas nga aldaw, santo iti
kamaudianan
Ket ti duadua kadagiti letra.
Maimayengka
Iti di panagragup dagiti paaweng tapno
kadagiti paratignay
Ket ti ipupusay nga awanan Panagungar.
Ngarud, mannurat a kabsatmi ida, inkan
Kadagiti tanem dagiti sao
Tapno sadiay ket ibunubonmo ti bukel
Ti pammadso. Itukitmo kadagiti nagumel
a bibig,
Nagkaem a ngiwat, nagbulsek a panirig
Tapno kadagiti inurit ket ti agburayok
nga ayat
Manipud iti ulimek a saguday ti
ranggas.
Agosto 28, 2012
Honolulu
No comments:
Post a Comment