Lana ti Pauli iti Waipahu

LANA TI PAULI ITI WAIPAHU 

Lagipem ti masakbayan, saan a ti nadudog 
A napalabas iti raw-ang ti duadua, iti pammati

Wenno kadagiti awanan ngatangata nga addang.
Addaka kadagiti adayo a lugar, kadagiti tapaw

A baniaga iti sapaw sabali a panagar-arikap
Iti rikna ita a mapadso ti Namarsuam, makusbo

A kas kenka. Adda buttuon iti panunot iti salakan
Iti aramid wenno iti isip, iti kugnal dagiti balikas

A mangibaga iti dalan a turongen. Ditoy Waipahu,
Ammuem ti justo nga isaang tapno maisapsapo ti panuli

Ti lana ti panuli nga iti naglabas a tawen,
Ket di man laeng narikna dagiti ramay, uray

Kadagiti nabannog a rabii nga agluluken ti tumeng
A makalagip kadagiti nakairuaman a kettang

Tapno daytoy nga unguento ti maipan iti altar
Iti baetan dagiti santo a nakaimatang, di agun-uni

Di makauni iti panagsaksi iti nainsagraduan,
Di maiyebkas ti patinggat' lagipa a nakas-ang:

Maysa ti aggapu Iti Istanbul, iti asul a moske,
Ti Virgen nga inyawidmo iti panagtawataw,

Madonna a testigo ti daraan a pakasaritaan
Iti adayo nga ili, kas iti daraan a narativo

Dagiti adu nga ima dagiti Ilokano kadagiti plantasion
Iti Waipahu nga ita ket benefisiarioka iti padso

Tuok, lulua, sakrifisio, dagitoy a pannakailansa
Iti baro a krus ti panagbiag, ti addaan kuarta

Ti baro a dios, ti awanan pirak ti mamanso
Idinto nga iti di unay adayo ket ti Waimanalu

Ti saksi dagiti adu a pannakaipupok ti bagi
Kadagiti saritaan a saani, kas iti sinnupadi

Iti demokrasio dagiti niog a magadgad, sa mapespes
Tapno ti getta dagitoy ket maitabbog iti pariok

Masisi kas iti pannakasisi amin a mabalin a masisi
Kadagiti marigrigat iti amin a lugar, iti man siudad

Dagiti babaknang wenno iti ig-igid dagiti pobre.
Bay-an a ti Viernes Santo nga apuy iti daytoy

Baro a beggang ket paruarenna daytoy a lana ti pauli
Tapno iyatang daytoy iti dagusan ti di agun-uni a dios.

Lutuem a naibbag ti getta, parubrobam ti karaang
Nga iti maysa a puligos ket matimpla ti apuy

Tapno rummuar ti ladek iti panagburek,
Tapno rummuar ti mabigbig nga angot

Tapno iti ag-agalen kadagiti tumeng, siko, rittuok
Dagiti sakit kadagiti lupoyen a takiag ket barawas

Ket maalada kadagiti pulagip, sapsapo
Panagtanamitim iti orasion nga iti sardam

Ket makaagas, makapabang-ar kadagiti amin
A protesta, reklamo, makasebseb iti revolusion

Iti barukong, kas iti utek, makaiddep iti segebseb
Tapno ita nga aldaw pammadso marugian ti kararag.

Hon, HI
Marso 29, 2013