Atang a Jollibee

Atang a Jollibee

Maidaton ken Ruben Acierto Asis Sr gapu ta kinunana a mauma kano met dagiti kararua iti pasig la amin a niniugan.

Pinadasmin ti atang a Jollibee, kapid.
Nasamay daytoy a panglanglanggong
Kadagiti anniniwan no kasta nga agarbis

Tapno agparuar kadagiti mangmangkik
Tapno agbuteng ti ili tapno dagiti isu met laeng
Nga isu a bagi iti sangkataw-an dagiti buklis

Ket mapanda a mangurimaong kadagiti araraw
Ti bagbagis. Agsasallasallapid dagitoy tapno
Iti irteng ti bisin ket ti pannakalagip iti gulib.

Undas ti nagan daytoy, undas ti bullilikong
A sao ti bullilikong a senador iti isip,
Daytay no agrason ket rason ti sinublan

A no bendisionam ket ti bukatot a wangawangan,
Agdawat uray kadagiti ruror ti tagainep
Uray kadagiti main-inaw a morado a diket!

Baam ti bua, gawen, nganga, ken ti dinubla.
Baam ti danum a pangiduron kadagiti telkak
A maibulon iti agrarrarek a karakaran ti ili.

Ti atang a Jollibee wenno McDonalds, iti lanit
Dagiti arapaap iti padaya nga addatayo amin,
Umanayen ti sangatukel a burger a drowing.

Agpayso a mauma dagiti pimmusay iti sumilasu
A panangiyayab iti espiritu ti makan. Lalo no
Ayabam amin a gusing kada pilay kada bulsek,

Amin dagitoy a kakaasi a makiranud iti bassibassit.
Isu nga ita, baonem ti barom, ibagam ti kayat,
Ideklaraman ti plebisito iti kontemporaneo nga atang.

Jollibee para kadagiti amin a kinusit ti biag.
McDonalds kadagiti amin a pinaidaman ti kapitolio.
KFC kadagiti amin nga agaw-awat iti segga.

Hon, HI/
Undas, Nov 2, 2013