PANNAKAISINGAY
(Ken Ka Sra Lydia Pavon, iti panagkasangayna, Noviembre 19,
2013.)
Kenka ti alinuno, kabsat, iti mata daytoy,
tapno sadiay, iti fuersa ti biag, agwerret
amin a basbas para kenka, para kadakami.
Kas iti di masbaalan a rikna nga aggapu
iti pussuak, agburayok nga agsalakan
iti pariir ti angin tapno kumamang iti puso.
Sadiay, iti sadimpalnek dagiti sagrado a balikas
nga iti dulin ket mangidaton iti ayat, awan
iti kuadrado a bibig no di adda iti uppat
a kararua ni ragsak, sadiay, ti maibudi a bukel
dagiti amin a laing tapno iti panagitukit
ket agruting sa agsantak iti bengkag ti biag.
Saan a maisaksakibot dagiti kakastoy.
Wenno maipan iti bolsito tapno di marabsut
ti estranghero a pul-oy. Ketdi, iti aglaplapusanan
a matagtagibi a dungngo ket ti maani a bukel
nga iti idadateng ti umuna a tudo ket agtubo
tapno sarangtenna ti umuna a rayray
iti agsapa dagiti tarumpingay.
Maisingay dagitoy kas iti pannakaisingaymo
tapno mangted iti asi kas iti ay-ayo.
Hon, HI/
Nov 19, 2013
No comments:
Post a Comment