Ti Atiddog nga Ima ti Rabii, Daytoy
[Para iti kabsat a nakalasat iti rungsot ti russuak-bagiw ti Yolanda idiay Merida, Leyte ngem napukawna ti 20 kadagiti kameng ti familiana. Ditoy nga agbalikas, ken istoriaek manen ti istoriana iti panagladingit. Agleddaangka, kabsat, ken agbiagka.]
Iti Merida, atiddog
Nga ima ti rabii daytoy.
Nasapa a dimteng
Ti diding a danum,
Dagiti imana ket magaw-atnat'
Sipi ti buteng iti puso, ket iti maysa a litak
Duapuloda, ti familiak,
Ti inkuyog ti dangkok ti alinuno,
A ti panagikkisda nga agpatulong
Ket linamut ti rungsot ti baybay.
Kasano a bilangem lua para iti lagip
Lua para iti pimmusay, sa ti pammakada
Agnanayon a maungaw,
Din makita pay, din maiyebkas pay
A ti katawa ken awanen
Iti arsadanan ti bantay?
Estoriaento manen ni Inang
No kasano dayta a nagulib a rabii,
Ket lagipennanto a madagdagullit
No kasano a binalkot dagiti annakna
Iti buteng-Yolanda, daytoy didigra
A mammadso a dida ammo.
Nakataraykami koma a nakalibas
Nakapagkamang iti tapaw,
Ngem maysa a barangabang
Ti nasipnget a rabii, kasipngetan
A dimi met ammo, mangibagbaga
A dikam pumampanaw, nga agtalinaedkami
Nga aguray kadagiti abongmi
A padanonenmi ti inna isasangbay
Ti panagtao-apo ti bagiw ken ti kari
Ti baniaga a russuak-baybay
A dimi met am-ammo.
Kasano koma a dimi naammuan
No ania ti langa ni patay
Iti panagkukkokna iti ridaw?
Immay a kaduana ti agsagsagawisiw
Nga angin, ken ditoy, iti daytoy a lugar
Manipud ditoy, nagorasionak,
Nagtanamitimak koma iti pangbugiaw.
Ket wen, inaramidko, kas iti kitingkiting
Ngem di pimmanaw no di nagipusing
Dina met ammo ti pagturonganna
No di ket mangawit kadagiti amin a maawit
Kadagiti amin a kabaelanna nga irarem,
Amin nga umang-anges, addaan anges,
Sibibiag, amin nga ammona ti agsamiweng
Amin nga ammona ti lumdaang.
Ket ita, mabatikami a manglagip
No kasano ti biag iti Merida, daytoy
A disso a nakangngegak iti kankansion
Iti rabii, a nakakitaak iti sala iti tudo
Ken disso a ni pammateg
Ket umay a singin iti agnanayon.
Panawakto ti malmaldaang a Merida:
Mapanak kadagiti disso a natalingenngen.
Dinakto panawan ti Merida
Tapno bay-annak kadagiti disso a natalingenngen.
Hon, HI/
Nov 18, 2013
No comments:
Post a Comment