Matay met uray dagiti diktador.
Impatoda siguro nga isuda ti agikut
Kadagiti aldaw.
Agkaduog ti panawen
Ken dagiti gagem, ket iti lawag
Ti init ket ti barsanga a manglanglangan.
Agur-uray dagiti tanem kadagiti amin,
Diktador man wenno saan
Dagiti agbugsot a matay.
Kas iti daytoy a Duvalier
Nga iti pakasaritaan ti Haiti
Ket ti kanibusanan dagiti am-amangaw.
Anansata idi kalman laeng
Ket ti galinggaling ket siglat
Nga iti latok ket ti bileg
A di mapaksiak. Kas kadagiti ulser
Iti tumeng, sa iti dapan,
Di umpes no mapan iti nakem
Ketdi, umukuok iti amin a selula
Ni lagip kas iti buteng kadagiti ridaw,
Ti panagkukkok ti ngudo ti paltog
A maipaturong iti puseg ti umok.
Sagrado dagiti oras,
Ngem saan iti diktador
Nga agikut uray iti agmamayo
A rusok ti mabisin a pagador.
Amanen maidiaya nga appupo
Awanen kakalbitan
Uray kadagiti armalait
Nga idi kalman ket umuulaw.
http://www.foxnews.com/world/2014/10/04/ousted-haitian-dictator-jean-claude-duvalier-dies/
No comments:
Post a Comment