Allaalla

Storming heaven with prayers is evacuee Teodora Factor, 82, who recites the “Oratio Imperata” at the bishop’s residence in Borongan City, Eastern Samar province. Raffy Lerma, PDI, 7 Dec 2014.  

Siak ni Teodora, ti butttuon ti Dios. 
Kaniak ti panagsagaba kadagiti amin a panawen, 
siak nga inanak dagiti dalluyog, bagio, ginggined
siak a naipusing manipud kadagiti adu a kari
dagiti rabii a nasipnget
dagiti sardam a mamagpadpadanon kadagiti sayyo
ni manglimlimo a gasat ditoy Borongan. 
Ita ket addaak iti palasio ti obispo, ket kas iti kaaduan,
agkarkararagak tapno iti kasta ket koma
ti dios ti mannusa nga angin ket dina ipakat kadakami ita
ti kabaelanna a mangparukma kadagiti balabala
ti tagainepmi, dakami a mamati iti baro a biag.
Saan ta saan a pudno nga addan abung-abongmi
manipud kadagiti balikas ti presidente wenno kadagiti amin
a mamati iti saona, kas ti mararosas a kinnikinni 
ti sekretaria dagiti amin a gulib ti ili kadakami.
Ania koma  dokumento ti mangipakita nga ita, 
wenno kadagitoy nga agdakiwas dagiti butengmi 
ket maarikapmi iti barukong dagiti un-unnoy ti aldaw
kadakami tapno, iti idadateng ti milagroso a darikmat
ket ti panagkansion ti pul-oy tapno iti pannakigubal
iti diosa dagiti mammapatay a danum ket ti talinaay
iti pusomi iti laksid ti agpatnag nga ablat 
ti mannusa nga angin kadakami?

Ita ket bay-andak nga agkararag, ipapuso ti araraw
kadagiti amin nga espiritu, kadagiti anito 
ti ili. Gapu ta din mapilko ti tumeng, bay-andak 
a ti rikna ti pumarintumeng tapno ipukkawko
ti agdung-aw iti nagmanto a langit, ket kunaek,
Apo Dios ti langit ken daga, degdegam, degdegam, 
degdegam, Apo aya, ti manangngaasi kadakami
nga inaramiddan a kakaasi ket, wen, Apo aya, 
saan, dimo degdegan ti panangngaasim 
kadagiti amin a mangar-aramid kadakami a bambanti. 

7 Dec 2014/Hon

No comments: